MANILA, Philippines – Magbibigay si Pangulong Duterte ng tig-P1 milyon sa sinumang makakapagturo sa natitira pang miyembro ng Abu Sayyaf na nakaengkuwentro ng militar sa Inabanga, Bohol.
Sinabi ng Pangulo na kung sino man ang makakapagbigay ng tip o makakapagturo sa mga ASG ay lumapit lamang sa mga pulis at sundalo.
Ipinag-utos na rin ng Pangulo sa militar at pulisya na tapusin na ang grupo na bukod sa mga ginagawang panggugulo ay nangingidnap pa ng mga banyaga at sibilyan.
Inihayag din niya na kapag naipit ang bayan dahil sa ASG ay ipag-uutos niya ang invasion ng Jolo.
Nagbalak din ang Pangulo kahapon na bisitahin ang mga namatay na tropa ng gobyerno pero pinigilan umano ito ng mga sundalo dahil mahirap ang daan at maputik.
Kasabay nito, naniniwala si Pangulong Duterte na target ng Abu Sayyaf na guluhin ang ASEAN-related meetings sa Bohol kung saan posible umanong plano nilang dukutin ang mga foreign ministers o participants.
Samantala, kasunod ng pangakong “lethal blow” ng militar, 34 na Abu Sayyaf ang nasakote at isa ang napatay sa pagsalakay ng tropa ng AFP habang nagsasagawa ng shabu session sa Bgy. Danag, Patikul, Sulu kahapon ng madaling araw.
Ayon kay Brig. Gen. Cirilito Sobejana, Commander ng Joint Task Force Sulu alas-4 ng madaling araw nang lusubin ng Army’s 45th Infantry Battalion (IB) ang kuta ng mga bandido sa nasabing lugar.
Ito’y kasunod ng utos ni AFP Chief of Staff Gen. Eduardo Año sa tropa ng JTF Sulu na maglunsad ng ‘lethal blow’ laban sa grupo matapos ang pamumugot ng ulo sa hostage na ship captain na si Noel Besconde noong Huwebes Santo sa Patikul, Sulu.
“Alam mo yung Abu Sayyaf talagang gumagamit sila ng drugs, kaya kung kita mo kung pumugot sila ng ulo very inhuman, na hindi nila alam kung ano ang ginagawa nila e, so we suspect they are high on drugs,” pahayag ni Sobejana.
Tumagal ng mahigit 15 minuto ang palitan ng putok saka mabilis na nagsitakas at inabandona ng Sayyaf ang kanilang kampo ng mapaslang ang kasamahan na gumagamit ng alyas na Jah Adul Jah.
Arestado rin sa operasyon ang 34 pang bandido na kinabibilangan ng 33 lalaki at isang babae na hinihinalang supplier ng droga ng ASG. Isang sundalo rin ang nasugatan na kinilala sa apelyidong Corporal Caramat.
Nasamsam naman sa operasyon ang isang M16 rifles, tatlong cal. 45 pistols, drug paraphernalias, limang granada at tatlong malalaking plastic sachet ng shabu.
source: Pilipino Star Ngayon